ملت ايچينده

مينلرجه گوزل اولسا ميللت ايچينده
اولماز سنه بنزر گوزه ليم خلقت ايچينده

هجرينده نه لر چكديگيمي وصلينه يئتسم
بيربير سنه عرض ائلييه رم صحبت ايچينده

كويوندا صفا چكمه گه يول وئرمه رقيبه
يوخدور يئري خائن آدامين جنت ايچينده

بيگانه سوزون آچما منه غصه دن اوللم
بيمار ايچيرسه زهري شربت ايچينده

مين جاذبه واردير گوزه ليم مست گوزونده
انسان سنه باخديقجا قالير حيرت ايچينده

((واحد)) مني هر دم كي گوروب دينديرر او گول
كونلوم آچيلير روحوم اوچور لذت ايچينده

واحد