|
هدايت ذاكر ايله مصاحبه
1382 نجي ايل
آذربايجانليلارا بير اونودولماز ايل اولوب و آذربايجانين ميللي حركتينده
بويوك رول اويناييب دير. بو ايلين بويوك اولايي لارينين بيري 21 آذر
گونونده تبريزين اماميه قبريستانليغيندا "فريدون ابراهيمي" نين مزاري
اوسته توتولان مراسيم ايدي. بو ييغينجاق 21 آذر و او زماندا اوز وئره ن
اتفاقلاري يئنه ده يادلارا سالدي. تاسفلر اولسون كي امنيتي و انتظامي
مامورلارين توسط ايله بو ييغينجاقين قاباغي آلينيب و بو مراسيم ده اشتراك
ائدنلرين اونلار نفري توتولوب و حتي بعضي سيده نئچه گون حبسه آلينديلار.
بو گونده توتولانلارين
بيري "هدايت ذاكري" جنابلاري ديلار كي 21 آذر گونونده توتولوب و نئچه
مرحله بازجويي دن سونرا 83 جي ايلين ارديبهشت آيينين 28 ده سون دادگاهي
برگزار اولاجاق.
بو بهانه دن اوتور جناب
"ذاكري" نين خدمتينه يئتيشيب و اونلارايله تانيش اولماق ايسته ديك.
آقاي
ذاكري تانيش اولماغيميزدان اوتور اوز بيوگرافينيزي ذكر ائدين:
من هدايت ذاكري 1353نجي
ايلده اهر شهرينده آنادان اولوب و ايلك تحصيلاتيمي تبريزده بيتيرندن
سونرا تربيت معلم مركزينده ن فوق ديپلم آلميشام. نئچه ايل آذربايجان
كندلرينده درس وئرمگه مشغول اولوب و سونرا تحصيلاتيمي پيام نور
دانشگاهيندا دوام وئريب و اوردان علوم تربيتي ليسانسيني آلماغا موفق
اولموشام. 71 نجي ايلده ائولنيب كي اونون نتيجه سي بير اوغلان و بير
قيزدير.
"يول" درگي سينده ((تورك
اوغلو)) و ((آرازلي)) آديندا قلم چاليب و سونرا پيام نو، نويد آذربايجان،
اميد زنجان و شمس تبريز درگي لريند ه منيم بير پارا يازيلاريم چاپ
اولموشدور.
آقاي ذاكري آذربايجانين ميللي حركتيندن اوتور نظرينيز نه دير؟
آذربايجانين ميللي
حركتي بير گنج و مقدس حركت دير. بو حركت قدرت دعواسي دئيل و اونون
كاريزما سي يوخدور و باشچيليغي اويره نجيلر الينده دير.بو حركت چوخ گوجلو
و اراده لي بير حركت دير و چوخ آغير پتانسيلي وار. چون بو حركت ميللي بير
حركتدير و اوره كلردن قاينايير اونون قاباقيني آلماق اولماز و فقط بو
حركتي تيكه- تيكه ائتمه گيله اونا ضربه ويرماق اولار. بو حركتده هر كس
ائده بيلر بير باشچي اولسون چون بو حركت هئچ شخص يا مشخص قورقو يا باغلي
دئيل و بو حركتين ايللر بويو شوونيسم و باشقا دوشمانلارين قاباقيندا
دايانماسينين علتي ائله بو دير.
آقاي ذاكري! بيزيم كيمي گنجلرين وظيفه سي بو حركتين قباليندا نه دير؟
هر كس هر يئرده اولموش
اولسا اوز گوجو قدر چاليشمالي دير. بيزيم قازانجيميز گره ك وئرديغيميز
هزينه دن چوخ اولسون. چون بو حركت بير جوان حركت دير اونو آپارانلارين
چوخلوسودا ائله گنجلر ديلر. بو گنجلر گره ك افراط و تفريط دن اوزاق اولوب
و حركتين پارچالانماسينين قاباقين آلسينلار. بيز گره ك ((منليگي))
ييغيشديراق و يئرينه ((بيزليك)) ياراداق! و اوره كلري بير- بيرينه داها
ياخينلاداق.
آقاي ذاكري سيزين هدفيز 21 آذر گونونده تبريزين اماميه قبرستانليغينين
ييغينجاقينا گئتمكدن نه ايدير؟
پيشه وري حركتي
آذربايجان تاريخينين بويوك اولاييلاريندان ساييلير اما تاسفلر اولسون كي
بو حركت هله ياخشي آيدينلاشماييب و اونون اصيل هدفلري ميللته دئييلمه ييب
. بيز بو حركتين اوستونده آرتيق آراشديرما ايستيريك و اونو تنقيد
ائديريك. نه اونو تام رد ائديب و نه كامل قبول ائديريك.
آقاي ذاكري! دادگاهيز هارا چاتيب و ايندي كي وضعيتينيز نئجه دير؟
آيين 21 نده منه بير
احضاريه گليب و بو آيين 28 نده منيم سون دادگاهيم برگزار اولاجاق. بو
دادگاه منيم ايكينجي دادگاهيم دير. آموزش و پرورش طرفيندن شفاهي صورتده
اخراجا تهديد اولموشام و نئچه يولدا تانيلماميش تلفونلار ائويميزه اولوب
و مني تهديد ائديبلر.دادگاهلارو بازجوييلار بير عادي روالدير اما بو
تلفونلار باعث اولوب عائله م منيم جانيمدان نگران اولسونلار .
آقاي ذاكري!وقتيزي آلمادان سيزدن تشكر ائديريك و اگر باشقا سوزوز وار
بويورون؟
منده سيزدن و بوتون
گنجلردن مخصوصآ اويره نجي لردن تشكر ائديرم.اويره نجيلر24 آوريل سويه
سينده چوخ گوزه ل و ده يرلي حركت ائتديلر و بير داها حركتين گوجون و
اوياغليغين هامييا گوسترديلر.
|
