اوخولسوز ديل

سايانميرام بير، ايكي

مني قينايير ننه م

اوخولوموز يوخدور كي

اوز ديليمي اويره نم

بولبول كيمي سويله رم

سوروشسالار يك و دو

فارسجا ياخشي بيله رم

اويرنديگيم بو دور بو

توركجه دانيشسام سوزوم

اسگيك گلر، قورتولار

اولر اوزومده اوزوم

ديليم سوسار، توتولار

آنا ديلين آنلامي

اونوتموشام دوغروسو

اونوتقان بير آدامين

گئده ر بير گون آبروسو

من بير يانا، آنامدا

هله سني اونودوب

ايندي آنجاق آتامدا

اينمز- دينمز اوتوروب

نئجه دئييم سنه من

آنا ديلي، آي ديليم

سني سوراندا هر دن

آنام دئيير: نه بيليم؟!

سن بير قوردون ديلي ايدين

يادلار سني ايديلر

بويوك يوردون ديلي ايدين

خاطيرينه ديديلر

آنام سنه ياييقسا

يئنه آنا ديليم سن

دويغولاريم آييقسا

ابدي نيسگيليم سن

رسول قرباني مقدم